Cəlilabad şəhər 3 nömrəli və 9 nömrəli tam orta məktəblərində "Uşaq hüquqları aylığı" çərçivəsində növbəti tədbir keçirilib. Bu haqda məlumatı Cenublu.az bu gün, 16 noyabr tarixində verir.
Tədbir çərçivəsində “Sağlam həyat tərzi, sağlamlığın qorunması, sağlam ətraf mühitdə yaşamaq hüququ, uşaqlar və gənclər arasında narkomaniyaya və digər zərərli vərdişlərə qarşı sosial-hüquqi mübarizənin gücləndirilməsi” və “Uşaqların zərərli informasiyadan qorunması” mövzularında maarifləndirici söhbətlər aparılıb. Həmçinin burada uşaq hüquqları sahəsində qəbul olunmuş qanunlar, dövlətimiz tərəfindən uşaqların hüquqlarının qorunması istiqamətində həyata keçirilən mühüm tədbirlər və sağlam mühitdə yetişməsinin əhəmiyyəti barədə ətraflı məlumat verilib.
Görüşdə Ombudsmanın Cənub Regional Mərkəzinin rəhbəri Ziya İsmayılov, RİH başçısı aparatının Yetkinlik yaşına çatmayanların işləri və hüquqlarının müdafiəsi üzrə komissiyanın məsul katibi Xumarə Xəlilova, Yetkinlik yaşına çatmayanların işləri və hüquqlarının müdafiəsi üzrə komissiyanın uşaqlarla iş üzrə məsləhətçi-psixoloqu Günay İbadova, rayon polis şöbəsinin Yetkinlik yaşına çatmayanlarla profilaktiki işin təşkili qrupunun inspektoru Anar Atakişiyev, rayon gənclər və idman sektorunun müdiri Vüqar Cavadov və məktəbin yuxarı sinif şagirdləri iştirak ediblər.
Qeyd edək ki, tədbir Cəlilabad Rayon İcra Hakimiyyətinin, Ombudsmanın Cənub Regional Mərkəzinin, Lənkəran-Astara Regional Gənclər və İdman İdarəsinin Cəlilabad rayonu üzrə gənclər və idman sektorunun təşkilatçılığı ilə həyata keçirilib.
