Cəlilabadda Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyi tərəfindən Peşələr Festivalı keçirilib. Bu haqda məlumatı Cenublu.az bu gün, 15 noyabr tarixində Report.az-a istinadən verir.
“Peşəni peşəkardan soruş!” devizi ilə keçirilən festivalda agentliyin idarə heyəti sədrinin müavini Cəmaləddin Quliyev, Cəlilabad Rayon İcra Hakimiyyəti başçısının müavini Nazim Şükürov, dövlət və özəl qurumların nümayəndələri, məktəblilər, tələbə və gənclər iştirak ediblər.
Qonaqlar gənclərin düzgün peşələrə istiqamətləndirilməsində və peşələrlə tanış olmasında festivalın mühüm rol oynadığını qeyd ediblər. Daha sonra təqdim olunan peşələrin stendləri ilə tanışlıq olub, peşələr üzrə ekspertlərlə söhbət edilib.
Festival çərçivəsində iştirakçılar təqdim edilən peşələr üzrə hansı bacarıqların tələb olunduğunu öyrənib, müxtəlif peşələr üzrə ekspertlərin təqdimatlarında iştirak edib və peşələrlə əyani şəkildə tanış olmaq imkan əldə ediblər.
Bundan başqa, festival iştirakçılarına agentliyin Mərkəzi Karyera filialının karyera məsləhətçiləri tərəfindən peşəyönümlü məsləhət xidmətlərinin göstərilməsi təmin edilir, onlara xidmətlər haqqında məlumat verilir.
