18 avqust 1919-cu ildə Azərbaycan Xalq Cümhuriyyəti tərəfindən dövlətin sərhədlərinin mühafizəsi ilə bağlı qanun qəbul olunub. Həmin qanuna əsasən, Azərbaycan Xalq Cümhuriyyəti Hərbi Nazirliyinin tərkibində Azərbaycanın ilk Sərhəd Qoşunları dəstəsi yaradılıb.
Sovet hakimiyyəti dövründə Sərhəd Qoşunları Dövlət Təhlükəsizlik Komitəsinin strukturu kimi mövcud idi. 1992-ci ildən isə sərhəd xidməti Milli Təhlükəsizlik Nazirliyinin tərkibində fəaliyyət göstərməyə başlayıb.
Ümummilli Lider Heydər Əliyevin 16 avqust 2000-ci il tarixli Sərəncamına görə, hər il 18 avqust sərhədçilərin peşə bayramı kimi qeyd edilir.
Heydər Əliyevin 31 iyul 2002-ci ilə aid Fərmanında Azərbaycan Respublikası Milli Təhlükəsizlik Nazirliyinin Sərhəd Qoşunları İdarəsinin əsasında Azərbaycan Respublikasının Dövlət Sərhəd Xidməti yaradılması qeyd olunub. Həmin Fərmanla Dövlət Sərhəd Xidmətinin rəisi Sərhəd Qoşunlarının komandanı təyin olunub. Dövlət Sərhəd Xidmətinin yaradılması və ona mərkəzi icra hakimiyyəti orqanı statusunun verilməsi Azərbaycan sərhədçilərinin fəaliyyətinin inkişaf etməyinə imkan yaradıb.
