18 avqust 2016-cı ildə 41 yaşlı Rövşən Lənkəranski Türkiyənin İstanbul şəhərinin Beşiktaş rayonundakı Barbarossa Bulvarında hoteldən çıxarkən naməlum şəxslər tərəfindən qətlə yetirilmişdir. O, 20-yə yaxın güllə yarası ilə İstanbulda xəstəxanaya aparılmış, lakin orada dünyasını dəyişmişdir.Rövşən Lənkəranskinin qətlinin kim tərəfindən təşkil olunması ilə bağlı bir neçə versiya mövcuddur. İlk olaraq güman edilirdi ki, Rövşən kürd terrorçuları tərəfindən öldürülüb. Buna səbəb isə 16 yanvar 2013-cü ildə Moskvada kriminal qruplaşmalardan birinin başçısı, yezidi kürd olan “Ded Xasan”ın qətlində Rövşənin əli olduğu ehtimalı idi. Digər versiyaya görə, Lənkəranskinin öldürülməsi 2016-cı ilin yazında “göyərti kralı” Cambulat Şamil oğlunun güllələnməsinin qisasının nəticəsi olub.
Rövşən Lənkəranskinin həyatı bu hadisədən öncə də bir neçə dəfə təhlükə altında olmuşdur. Ona qarşı iki sui-qəsd təşkil edilmişdir. Lakin o, 2001-ci ildə Dubayda 3 bıçaq yarasından, 2013-cü ildə isə Turkiyədə sui-qəsd cəhdindən sağ qurtula bilib.
Ölümündən sonra Rövşən Lənkəranskinin cənazəsi anadan olduğu Lənkəran şəhərinə xüsusi təyyarə ilə gətirilərək, şəhərin Kiçik Bazar qəbiristanlığında, atasının məzarının yaxınlığında dəfn edilib. Deyilənlərə əsasən, hava limanında onun cənazəsini 60-70 minə yaxın insan qarşılayıb.
Rövşən Lənkəranski dəfn olunduqdan bir müddət sonra məzarının üzərində heykəli qoyulub.
