Bu gün, 7 sentyabr tarixində Lənkəran Dövlət Dram Teatrının aktrisası Gülər Rövşən qızı Kərimovanın doğum günüdür.
Gülər Kərimova 1988-ci ildə Lənkəran şəhərində anadan olub. 2005-ci ildə şəhər 7 saylı orta məktəbini bitirərək Lənkəran Dövlət Humanitar Kollecinə daxil olub. 2008-ci ildə təhsilini başa vuraraq bir il sonra Lənkəran Dövlət Dram Teatrına yardımçı aktrisa kimi işə qəbul olunub.
İlk əvvəllər teatrın səhnəsində Elçinin “Dəlixanadan dəli qaçıb”, M.Xubainin “Şeytanın oyunları”, Ç.Aytmatovun “Manqurt” tamaşalarında çıxış edən aktrisa özünü istedadlı sənətçi kimi göstərib. Sonralar o, Güldər (Latıpovlar “Şah və əks-səda”), Qırmızıpapaq (Ş.Perro “Qırmızıpapaq”), Nisə (M.F.Axundov “Lənkəran xanının vəziri”), Oksana (K.Nəzirli “Şeytan işığı”, Sabit (X.Həsənova “Qız sərgüzəştləri”), Elianta (J.B.Molyer “Mizantrop”), Fizzə/Ziba (C.Məmmədquluzadə “Danabaş kəndlinin əhvalatları”), Budur (Ərəb xalq nağılı “Ələddinin sehirli çırağı”), Marya (Ə.Əsgərov “Ölməz kaşşey”), Kamela (E.D.Filippo “Ruhlar”) və s. bu kimi müxtəlif xarakterli rolları ifa edib.
G.Kərimova dəfələrlə respublika müsabiqələrinin iştirakçısı kimi mükafatlara layiq görülüb. Aktrisa həmçinin ayrı-ayrı teleseriallarda rollar alıb.
