Eldar İsfəndiyar oğlu Həsənov 26 dekabr 1965-ci ildə Cəlilabad rayonunun Lallar kəndində anadan olub. O, Səddam ləqəbi ilə tanınıb.
O, 1983-cü ildə Cəlilabad rayonunun Xanəgah kənd orta məktəbini bitirib. 1984-1986-cı illərdə Həsənov hərbi xidmətdə olub [1].
1990-cı ilin dekabr ayından başlayaraq Eldar Həsənov Azərbaycanda ermənilərin törətdiyi cinayətlər zamanı Vətən uğrunda düşmənə qarşı vuruşub. O, bəzən kəşfiyyata tək gedərək, iki-üç əsirlə geri dönürdü [2]. Həsənov 1991-ci ildə Qaladərəsi əməliyyatında jurnalist Salatın Əsgərovanın qatillərinin tutulmasında, Goranboy rayonunun Buzluq, Erkəç, Mənəşli kəndlərinin və Ağdamın Ağbulaq kəndinin erməni qudurlarından təmizlənməsində, Cəbrayıl rayonunun Saqah yüksəkliyinin alınmasında iştirak edib [3]. 1992-ci ildə o, Laçın döyüşlərində olduğu dəstəni mühasirədən itkisiz çıxarıb. Həsənovun başına ermənilər 50000 dollar məbləğində mükafat qoymuşdular [2].
Eldar Həsənov 1992-ci ildə Polis Akademiyasına daxil olub. 1994-cü ilin yanvar ayında Həsənov yenidən cəbhəyə yollanıb. O, Füzuli bölgəsində ermənilərin xeyli canlı qüvvəsini, texnikasını məhv edib [1].
12 may 1994-cü ildə Horadiz yaşayış məntəqəsi uğrunda ağır döyüşlər gedən zaman Eldar ermənilərlə ön cərgədə vuruşurdu. Lakin düşmən tərəfindən atılan və qəfil partlayan mərmi ucbatından Eldar Həsənov həlak oldu. Daha sonra o, Cəlilabad rayonunun Lallar kəndində dəfn edildi. 15 yanvar 1995-ci ildə Eldar Həsənov “Azərbaycanın Milli Qəhrəmanı” adına layiq görüldü [2].
Hazırda Cəlilabad Rayon Polis İdarəsinin həyətində Eldar Həsənovun büstü var [1].
Ədəbiyyat:
