Şəkər Mirzə oğlu Aslanov 10 oktyabr 1935-ci ildə Lənkəran rayonunun Boladi kəndində anadan olub. O, Şəkər Aslan təxəllüsü ilə tanınıb.
Aslanov Boladi kənd orta məktəbini bitirdikdən sonra kənd klubunda, Port-İliç (indiki Liman şəhəri) və Lənkəran şəhər mədəniyyət evlərində işləyib. O, 1963-1968-ci illərdə Moskvada M.Qorki adına Dünya Ədəbiyyatı İnstitutunun poeziya fakültəsində təhsil alıb. O, 1968-1970-ci illərdə rayon partiya komitəsində təlimatçı, 1970-1992-ci illərdə “Leninçi” (indiki “Lənkəran”) qəzetində redaktor, 1992-1995-ci illərdə isə Azərbaycan Yazıçılar Birliyi Lənkəran bölməsinin məsul katibi işləyib [1].
Şəkərin ədəbi fəaliyyəti Lənkəranın “Sosialist subtropikası” qəzetinin 23 iyul 1953-cü il tarixli sayında çıxan, “Koreyalı bacıma” adlı şeiri ilə başlayıb. O, öz poeziyasında Lənkəran təbiətindən, Vətənə məhəbbətdən və sevgidən yazırdı [3].
Aslanov 1961-ci ildə öz şeirlərini poçtla Bakıya, şair Nəbi Xəzriyə göndərib. O, sonra bu haqda belə yazıb: “İlk şeirlərimi 1961-ci ildə Azərbaycanın görkəmli şairi Nəbi Xəzriyə göndərəndə hansı hisslərlə yaşayırdım? Lakin şairin xeyirxah məsləhətlərlə dolu məktubunu alandan sonra sanki tərəddüd və şübhə məni müəyyən qədər tərk etdi. Onların yerini əsl inam tutdu. Şeirlərim mətbuata yol tapdı” [2].
Ədəbiyyatşünas Seyfulla Əsədullayevə və filologiya elmləri doktoru Hüseyn Həşimliyə görə, Azərbaycan ədəbiyyatında sonetlər çələnginin ilk nümunəsini 1978-ci ildə Şəkər Aslan yaradıb [2].
Onun şeirlərinə Vasif Adıgözəlov, Oktay Kazımov, Tofiq Quliyev, Tofiq Əhmədov, Nəriman Məmmədov və s. bəstəkarlar tərəfindən musiqilər bəstələnib [3].
Şair “Bahar yağışı”, “Ürəyimi açıram”, “Sevgi günü”, “Səni sevdiyim gündən”, “Döy mənim qapımı”, “Samovara od salmışam”, “Evə məktub”, “Payıma düşən ömür” və s. kitabların müəllifidir [3].
Aslanov 1978-ci ildə “Qızıl Qələm” mükafatının laureatı olub. O, 1981-ci ildə Azərbaycan Ali Soveti Rəyasət Heyətinin Fəxri Fərmanına və “Şərəf nişanı” ordeninə layiq görülüb [1].
Şəkər Aslan 12 iyun 1995-ci ildə vəfat edib və Boladi kəndində dəfn olunub [1,2]. Lənkəran şəhərinin küçələrindən biri onun adını daşıyır [1].
Ədəbiyyat:
