Zakir Əmin oğlu Aslanov 15 may 1961-ci ildə Cəlilabadın Sadatlı kəndində anadan olub. O, Zakir Sadatlı kimi tanınıb.
O, 1978-ci ildə Privolnoye kənd orta məktəbini bitirib. Sadatlı 1979-1981-ci illərdə hərbi xidmətini Əfqanıstanda yerinə yetirib. Zakir Sadatlı 1983-1987-ci illərdə Azərbaycan Dövlət Pedaqoji İnstitutunun filologiya fakültəsində təhsil alıb. Əmək fəaliyyətinə o, 1987-ci ildən Bakının 1 saylı şəhər orta məktəbində müəllim işləməklə başlayıb [1].
Sadatlı 1990-1993-cü illərdə Birinci Qarabağ müharibəsindəki döyüşlərdə ön cəbhədə vuruşub.
O, 1993-cü ildən “AzTV” QSCnin “Hərbi vətənpərvərlik və salnamə” redaksiyasının redaktoru vəzifəsində, 2010-2013-cü illərdə indiki “Radio Respublika”da çalışıb. Sadatlı 20-dən artıq sənədli filmin və verilişlərin ssenari müəllifi olub [2].
Zakir Sadatlı 1983-cü ildən ədəbi-bədii yazıları ilə mətbuatda çıxış edib. Onun ilk mətbu şeirləri olan “Karvan”, “Kamillik məsafəsi”, “Dəşti” Cəlilabadın “Yeni gün” qəzetində dərc olunub. Bundan əlavə, yazıçı “Əfqanıstan uçurumu”, “İraq olsun”, “Salam, baça” və digər əsərlərin müəllifidir [1,2].
2008-ci ildə Sadatlının “Salam, baça” hekayəsi Mahmud Kaşğarinin doğumunun 1000 illiyi çərçivəsində UNESCO-nun 24 türkdilli ölkənin yazarları arasında keçirdiyi müsabiqədə 1574 əsər içində üç qalibdən biri olub.
Zakir Sadatlı AXC dövründən bəhs edən bir çox məqalələr yazıb. Azərbaycan Cümhuriyyəti fədailərindən biri Əziz Alpoudun “Həyatımın hekayələri” memuarı yazıçı tərəfindən türk dilindən Azərbaycan dilinə tərcümə edilərək, nəşr olunub [2].
2013-cü ildə Sadatlının “Əfqanıstan uçurumu” adlı xatirə-romanı nəşr edilib. Bu əsər Azərbaycan ədəbiyyatında ən böyük ədəbi-bədii layihə olan “Milli Kitab Mükafatı”nın qalibi olub.
Zakir Sadatlının əsərləri və şeirləri rus, türk, ərəb, alman və tatar dillərinə tərcümə olunaraq, dünyanın bir çox mətbuat orqanlarında nəşr edilib.
2005-ci ildə Azərbaycan Yazıçılar Birliyinin və Avrasiya Yazarlar Birliyinin üzvü seçilib [1].
Zakir Sadatlı 5 fevral 2013-cü ildə vəfat edib və Sadatlı kəndində dəfn edilib [2].
Ədəbiyyat:
