Qurban bayramı İslamda ən müqəddəs bayramlardan biri hesab edilir. Bu bayram hər il hicri-qəməri təqvimi ilə zilhiccə ayının 10-cu günündən başlayır və adətən, bir neçə gün davam edir.
Həmin gün Azərbaycanda və digər müsəlman ölkələrində məscidlərdə bayram namazı qılınır, mal-qara qurban kəsilir, vəfat etmiş adamların xatirəsini yad etmək əlaməti olaraq evlərdə və qəbiristanlıqlarda dua oxunur, ehsan verilir.
Qurban bayramı İbrahim Peyğəmbərin öz oğlu İsmayılı Allah yolunda qurban kəsmək niyyətini bildirən hadisə ilə əlaqəlidir. Allah İbrahim Peyğəmbərin sadiqliyini sınamaq üçün onun yeganə oğlu olan İsmayılı qurban kəsməyi tələb edir. İbrahim Peyğəmbər oğlunun başını kəsmək istəyərkən Allahın göndərdiyi mələk - Cəbrayıl göydən enib onun əlini saxlayıb, Allahın İbrahimdən razı qaldığını bildirib və oğlu İsmayılın əvəzinə yaradanın göndərdiyi qoçu kəsməyi təklif edir. Bu hadisədən sonra insanlar hər il ev heyvanlarından birini Allaha qurban kəsirlər. Bu səbəbdən Qurban bayramında kəsilən qurbana “İsmayıl qurbanı” deyilir. İslam dinində insanın qurban kəsilməsi qəbul olunmur.
Azərbaycan 1991-ci ildə müstəqillik əldə etdikdən sonra, 1992-ci ildən “Azərbaycan Respublikasının bayramları haqqında” qanununa görə, Qurban bayramı ölkədə dövlət səviyyəsində bayram kimi qeyd edilir.
