2 avqust tarixi Azərbaycan kinosunun yarandığı gündür. Həmin gün 1898-ci ildə Azərbaycan kinematoqrafının istehsalı olan ilk qısametrajlı, səssiz film ("İlişdin") nümayiş olunub. İlk film fotoqraf və nasir Aleksandr Mişonun çəkdiyi xronika süjetlər ("Bibiheybətdə neft fontanı yanğını", "Balaxanıda neft fontanı", "Şəhər bağında xalq gəzintisi", "Qafqaz rəqsi") və bir bədii kinosüjetdən ("İlişdin") ibarət idi.
Milli kinematoqrafın inkişafında Cənub bölgəsinin rolunu da qeyd etmək olar. Burada Münəvvər Kələntərli, Tərlan Fərzullayev, Nazir Əliyev, Kamil Nəcəfov, Fateh Fətullayev, Bahadur Əliyev kimi tanınmış aktyorlar, Ağarza Quliyev, Əflatun Nemətzadə, Nazim Abbasov kimi məşhur rejissorlar anadan olub.
Cənub bölgəsində bir sıra filmlər lentə alınıb. Onların sırasında "Qızmar günəş altında", "Ulduz" fimlərinin adını çəkmək olar.
Cənub bölgəsində Spartak adlanan ilk kinoteatr Lənkəranda 1926-cı ildə fəaliyyətə başlayıb. Bölgənin ən böyük kinoteatrı olan "Nizami" 1955-ci ildən 1990-cı illərə qədər fəaliyyət göstərib.
