Bu gün ölkədə Azərbaycan Əlifbası və Dili Günü qeyd edilir. Həmin gün ulu öndər Heydər Əliyevin 9 avqust 2001-ci il tarixli Fərmanına əsasən təsis edilib. Heydər Əliyev tərəfindən 1 avqust tarixinin seçilməsi həmin gün 1990-cı ildə Azərbaycan Əlifba Komissiyasının yaradılması ilə də bağlıdır.
Azərbaycan əlifbasının tərtib olunması ideyası Mirzə Fətəli Axundov və digər azərbaycanlı maarifçilər, ziyalılar tərəfindən XIX əsrin ikinci yarısından etibarən yaranıb. Bununla bağlı ilk addımlar sovet dövründə atılıb. 1922-ci ildə Azərbaycan SSR hökumətinin qərarı ilə yeni Əlifba Komitəsi yaradılıb. Bu komitə Azərbaycan dili üçün latın qrafikalı əlifbanı tərtib edib. 1923-cü ildən isə latın əlifbasına keçmə prosesi surətləndirilməyə başlayıb. Lakin 1 yanvar 1940-cı ildə latın əlifbası kiril qrafikalı əlifba ilə əvəz olunub.
1956-cı ildə Ali Sovetin qərarı ilə respublika Konstitusiyasına Azərbaycan dili haqqında maddə əlavə edilmişdir. Heydər Əliyevin səyi nəticəsində 1978-ci ildə qəbul olunan Konstitusiyada Azərbaycan dili dövlət dili kimi təsdiq edilmişdir.
1991-ci ildə Azərbaycan müstəqiliyini bərpa etdikdən sonra latın qrafikalı Azərbaycan əlifbasının bərpa olunması ilə bağlı qərar qəbul edildi. Lakin latın qrafikalı əlifbaya bütövlükdə keçid ümummilli lider Heydər Əliyevin 2001-ci ildə verdiyi Fərmanla bağlıdır.
