Alaşa bulaqları Astara rayonunda, Alaşa kəndindən 3 km məsafədə, İstisu çayının yatağında yerləşir.
Bu ərazidə ümumilikdə 16 bulaq mövcuddur. Bulaqlardan gələn su minerallar və digər elementlərlə zəngindir. Ərazidə axan suyun hərarəti 45-50 dərəcəyə çatır. Bu yerdəki su müalicə məqsədilə istifadə edilir. Ərazidə fəaliyyət göstərən müxtəlif kurort, sanatoriya və ambulatoriyalar şəraitində dayaq-hərəkət, periferik sinir, qan-damar sistemləri xəstəliklərini müalicə etmək mümkündür.
Budaq Budaqov və Nadir Məmmədovun fikirlərinə əsasən, “alaşa” sözünün hissəsi olan “ala” türk dillərindən tərcümədə “böyük”, “şa” isə talış dilindən tərcümədə “qədim” deməkdir, yəni coğrafi ad “böyük həyat” anlamını verir.
“Alaşa” sözü türk dillərində qədim dil elementi kimi bir neçə məna ifadə edir: “at”, “köçəri həyata alışmış heyvan”, “coşan, harın, inadkar”, “aşağı, alçaq”, “pis, murdar, iyrənc”. Bulaq adı kimi “pis, xoşa gəlməyən su” mənasını daşıyır. Bu isə suyun azotlu sular qrupuna daxil olmasından irəli gəlir.
Alaşa kəndində müalicəvi suyun olması haqqında 1870-ci ilə aid mənbədə məlumat verilib.
