Serbiyanın Vrbas şəhərində keçirilən yeniyetmə boksçular arasında Millətlər Kubokunda qızıl medal qazanan fəxrimiz Məhəmmədəli Qasımzadə Lənkəran şəhərinin girişində, Qala Qapılarında böyük təntənə ilə qarşılanıb. Bu haqda məlumatı Cenublu.az bu gün, 16 avqust tarixində Lənkəran Gənclər və İdman İdarəsinə istinadən verir.
Doğma şəhərinə qayıdan çempion ilk növbədə ümummilli lider Heydər Əliyevin abidəsini ziyarət edib. Daha sonra Lənkəran Şəhər Gənclər və İdman İdarəsində boksçu ilə görüş keçirilib. Görüşün sonunda çempionumuza Fəxri fərman və qiymətli hədiyyə təqdim olunub.
Qeyd edək ki, Lənkəran Gənclər və İdman İdarəsinin nəzdində UGİM-in yetirməsi olan Məhəmmədəli Qasımzadə 57 kq çəki dərəcəsində finalda Arun Tudoroiu (Rumıniya) üzərində 5:0 hesabı ilə parlaq qələbə qazanaraq Millətlər Kubokunun qızıl medalına sahib olub.
