Biləsuvar rayonunda həşəratların zərər vurduğu tut ağacları ikinci dəfə yarpaqlayıb. Bu barədə “Report"un yerli bürosuna rayon sakinləri bildirib.
Bioloq Vidadi Məmmədov bu halın qeyri-adi təbiət hadisəsi olduğunu qeyd edib. Onun sözlərinə görə, ağacların yay fəslində ikinci dəfə yarpaqlaması məcburi prosesdir:
"Bu hal fotosintez prosesi ilə bağlıdır. Bizim ərazilərdə adətən ağaclar yarpaqlarını noyabrda, ilk şaxtalı havalarda tökür. Lakin bu il proses daha tez baş verib. Ağaclarda hələ qış yuxusuna getmədiyi üçün, özlərini müdafiə səbəbi ilə yenidən yarpaq verməyə başlayıb. Mən yaşlı sakinlərlərlə söhbət etmişəm. Onlar da bildirdilər ki, ilk dəfədir, belə hadisə ilə qarşılaşırlar".
Qeyd edək ki, Biləsuvarda təxminən iyun ayından zərərverici tut odlucası kütləvi halda tut ağaclarının yarpaqlarını yeyərək, məhv edib.
