Bu gün Oqtay Kazıminin ölümündən 12 il keçir. Bununla bağlı Cenublu.az görkəmli bəstəkar haqda 10 fakt təqdim edir.
Oqtay Məmməd oğlu Kazımov (Kazımi) 27 dekabr 1932-ci ildə Astara şəhərində anadan olub. Orta məktəbi Astarada bitirdikdən sonra Asəf Zeynallı adına musiqi məktəbində Hacı Xanməmmədovun sinfində təhsilini davam etdirib.
Musiqi məktəbində oxuyarkən, "Bəxtəvər uşaqlar" adlı ilk mahnısını bəstələyib.
1957-ci ildə Üzeyir Hacıbəyov adına Konservatoriyanın bəstəkarlıq fakültəsinə daxil olub və Cövdət Hacıyevin sinfində təhsil alıb.
1966-1967-ci illərdə Sumqayıt musiqi texnikumunda müəllim, sonra isə dərs hissə müdiri kimi fəaliyyət göstərib. Elə bu illərdə "Eksperiment" estrada orkestrini yaradıb.
Onun mahnıları Rəşid Behbudov, Zeynəb Xanlarova, Şövkət Ələkbərova, Flora Kərimova, Yalçın Rzazadə, İlhamə Quliyeva, Oqtay Ağayev, Məmmədbağır Bağırzadə və digər müğənnilər tərəfindən ifa olunub və uzun müddət "Dan ulduzu" ansamblının repertuarında xüsusi yer alıb.
Oqtay Kazımi Azərbaycanda ilk rok operasının müəllifidir. Onun “Qaytar eşqimi”, “Həyat, sən nə qəribəsən”, “Əlvida”, “Tarla qızları” və bir çox mahnıları xalq tərəfindən çox sevilir.
Onun 16 simfonik, 10 vokal-xor simfonik, kamera-instrumental əsəri, 200-ə yaxın mahnısı və digər janrlarda xeyli sayda əsərləri var.
O, 1992-ci ildə Azərbaycan Respublikasının əməkdar incəsənət xadimi və 2006-cı ildə Azərbaycan Respublikasının xalq artisti adlarına layiq görülüb.
Oqtay Kazımi 9 avqust 2010-cu ildə Bakıda 77 yaşında vəfat edib.
18 sentyabr 2020-ci ildə bəstəkar Oqtay Kazıminin xatirəsinin əbədiləşdirilməsi məqsədilə Astara şəhərindəki Uşaq Musiqi Məktəbinə və Astara şəhərinin küçələrindən birinə onun adı verilmişdir.
