Məmməd İsrafil oğlu Kazımov 25 may 1934-cü ildə Masallının Tatyanoba kəndində anadan olub. O, Məmməd Kazım ləqəbi ilə tanınır [2].
Kazımov ilk təhsilini Yeyənkənddəki məktəbdə alıb. O, 1950-1955-ci illərdə Bakı Mədəni-Maarif Texnikumunda oxuyub. Həmin dövr yazıçının ilk şeirləri “Yeni həyat” (indiki “Çağırış”) qəzetində çap olunub.
Məmməd 1962-ci ildə BDU-nun kitabxanaçılıq fakültəsini bitirib. O, 1953-1958-ci illərdə Güllütəpə kənd kitabxanasında, 1962-1963-cü illərdə isə rayon uşaq kitabxanasında işləyib. Yazıçı 1959-1962-ci illərdə Tatyan, daha sonra Güllütəpə kəndindəki məktəbdə çalışıb.
O, 1963-1964-cü illərdə Masallıda radio verilişləri redaksiyasında, eyni zamanda N.Nərimanov adına 2 saylı orta məktəbdə işləyib. Kazımov 1965-1966-cı illərdə AMEA-nın Əsaslı kitabxanasında çalışıb. Yazıçı 1966-1968-ci illərdə Sarçuvar kənd məktəbində, “Abşeron” adlı rayon qəzetində işləyib. O, 1969-cu ildən Azərbaycan Dövlət Televiziya və Radio Verilişləri Şirkətində Gənclər redaksiyasında çalışıb.
Şair Məmməd Araz 1965-ci ildə öz məqalələrindən birində Məmməd haqqında yazıb: “Məmməd Kazımovun adına 1957-ci ildən respublikanın müxtəlif qəzet və jurnallarında rast gəlirik…Məmməd Kazım hər təzə şeirində bir qənaət yaradır, o axtarır, düşünür, zəhmətə qatlaşır, dəstədən geridə qalmayan istedadlar sırasında öz yerini tapmaq istəyir” [3].
O, 1971-1983-cü illərdə hərbi-vətənpərvərlik verilişi “Hünər”in aparıcısı idi [1]. Aparıcının Böyük Vətən müharibəsində itkin düşmüş mindən artıq əsgərin yaxınları ilə qovuşmasında rolu olub [4].
O, 1991-ci ildən Lənkərandakı “Qala” qəzetinin təsisçisi və baş redaktoru olub [1].
Yazıçının əsərləri sırasında “Xəzər laylası”, “Mirhəsən xanın övladları”, “General Həzi” və s. qeyd etmək olar. Kazımovun əsərləri ukrayna, ingilis, rus, tatar, latış dillərində çap edilib. Yazıçılar Nurəddin Ədiloğlu və Fərahim Xələflinin fikrincə, şairin “Fateh” poeması müasir Azərbaycan ədəbiyyatının ən uğurlu nümunələrindən biridir [2].
O, 1974-cü ildən Azərbaycan Yazıçılar Birliyinin, 1975-ci ildən Azərbaycan Jurnalistlər Birliyinin üzvü və “Qızıl qələm” mükafatı laureatı olub [1].
Məmməd Kazımov 10 mart 2018-ci ildə vəfat edib [4].
Ədəbiyyat:
