Səpnəkəran kəndi Lənkəran rayonunun ərazisində, Lənkəran-Astara şose yolunda, rayon mərkəzindən 10 km cənubda yerləşir. Yerli əhali tərəfindən kənd “Səpnəkon” adlandırılır [1].
“Səpnəkəran” sözü talış dilində olan “səpe” (yuxarı, üst) və “kəon” (evlər) hissələrindən düzəlib, yəni “yuxarıdakı evlər”, “üst evlər” və ya “səpələnmiş evlər” mənasını daşıyır [3].
Ehtimal olunur ki, tarixçi Mirzə Əhməd Mirzə Xudaverdi оğlu tərəfindən fars dilində yazılmış “Əxbarnamə” əsərindəki Sipehkəran kəndi indiki Səpnəkəran yaşayış məntəqəsidir. Əsərdə tarixçi talış hökmdarı Qara xanın (Seyid Cəmaləddin) ona xidmət edən Şahpələng adlı oğlana bu kənddə ev tikdirdiyini qeyd edir [2].
Səpnəkəran kəndi ərazisində bir neçə tarixi abidələr mövcuddur. Onların sırasında 1872-1875-ci illərdə inşa edilmiş Səpnəkəran kənd məscidini qeyd etmək olar [4].
Əhali, əsasən, taxılçılıq, çayçılıq, sitrusçuluq və tərəvəzçiliklə məşğuldur [1].
1915-ci ilə aid olan siyahıyaalınma məlumatına əsasən, Səpnəkəran kəndində 260 nəfərin yaşadığı qeyd olunub [5]. 2017-ci ilin statistik məlumatına əsasən, bu kənddə 1785 nəfər yaşayıb [1].
Ədəbiyyat:
