Astara rayonunun Ərçivan qəsəbəsindən olan Fatimə Əliyeva ABŞ-də təhsil aldığı məktəbdə Azərbaycan haqda təqdimat nümayiş etdirib. Bu haqda məlumatı Cenublu.az bu gün, 22 mart tarixində verir.
Dövlət Himnimizin səsləndirilməsi ilə başlayan təqdimatda “kiçik səfir”imiz 1 dəqiqəlik sükütla şəhidlərimizi yad edib. Daha sonra 100-dən çox insana Xocalı soyqırımı haqda, Azərbaycanın qədim tarixi, “Qarabağ” FK-nın uğuru, Novruz adət-ənənələrimiz və s. mövzularda məlumat verib. O, təqdimatlarında hər zaman bildirir ki, Azərbaycan Şərqdə qadınlara seçki hüququ verən ilk ölkədir. Fatimə müəllimlərindən oxuduğu sinfə Azərbaycan Bayrağını asmalarını xahiş edib və buna nail olub.
Qeyd edək ki, Fatimə Əliyeva Astara rayonunun Ərçivan qəsəbə 4 saylı məktəbini fərqlənmə attestatı ilə bitirib. O, 560 balla Xəzər Universitetinə qəbul olub. Hal-hazırda FLEX proqramının finalçısı olaraq 1 il ABŞ-də ödənişsiz 12-ci sinfi oxuyur.
