Məhəmməd Hənəfiyyə məscidi Astara rayonunun Ərçivan kəndinin qəbiristanlığında yerləşir. İbadətgahın 500-dən çox yaşı var. Kənd sakinlərinin dediyinə görə, məscidin əsası 1499-cu ildə qoyulub.
Səfəvilər dövlətinin banisi Şah İsmayıl Xətayi 1499-ci ilin avqust ayında Şirvana yürüşü zamanı Astaradan keçərkən bu məsciddə namaz qılıb. O, tərəfdarları ilə Astaranın Ərçivan kəndinə gələrək 1499-1500-cü ilin qışını burada keçirib.
Sovetlər dövründə məscid anbar kimi, hal-hazırda məscidin axundunun otağı isə kitabxana kimi istifadə olunub. Məscidin ərazisində yerləşən Hüseyniyyə binası anbar, kitabxana və idarə kimi istifadə olunub.
Məhəmməd Hənəfiyyə məscidinin divarları bişmiş kərpiclə hörülüb. Döşəməsi qırmızı kərpic, tavanı isə taxtadandır. Məscidin mehrabı sadə formaya malikdir, hündürlüyü isə 3 metrdir. Minbəri taxtadandır və yeddipilləlidir. Minbər 1984 -1985-ci illərdə düzəldilib.
1990-cı ildə bərpa işlərindən sonra məscid və Hüseyniyyə binası yenidən fəaliyyətə başlayıb. Məscid qadınlar və kişilər üçün nəzərdə tutulan şöbələrdən ibarətdir. Qadınlar şöbəsi ikimərtəbəlidir və ayrıca giriş qapısı var.
Qeyd edək ki, məscid imam Əlinin üçüncü oğlu Məhəmməd Hənəfiyyənin şərəfinə adlandırılıb.
