Astara rayon Mərkəzi Kitabxanasında görkəmli ədib və dramaturq Cəfər Cabbarlının 125 illiyi ilə əlaqədar tədbir keçirilib. Bu haqda məlumatı Cenublu.az bu gün, 16 mart tarixində verir.
M.Ə. Sabir adına Astara şəhər 1 saylı tam orta məktəbinin şagird və müəllim kollektivinin iştirak etdiyi tədbirdə Cəfər Cabbarlının həyat və yaradıcılığı barədə ətraflı məlumat verilib. Bildirilib ki, Cəfər Cabbarlı hələ uşaq yaşlarından insanların ağır vəziyyətini, cəmiyyətin yoxsullara və varlılara bölündüyünü görür, ağır, məşəqqətli həyat içərisində yaşamasını müşahidə edir və bütün bunları qələmə almağa, onlara öz münasibətini bildirməyə çalışır. Ayrı-ayrı ailələrin ağır vəziyyəti onu düşündürür. O, düşündüklərini "Boranlı qış gecəsi", "Bayram saxlayanlara", "Dilənçi" və "Novruz bayramına hazırlaşan müsəlmana töhfə" kimi şeirlərində əks etdirir.
Yekunda şagirdlərin ifasında ədibin əsərlərindən parçalar səsləndirilib.
