Azərbaycanın qədim sənət növlərindən biri olan həsirçiliyin inkişafı Astara və Lənkəran rayonlarında davam etdirilir. Buna səbəb bölgənin iqliminin rütubətli olmasıdır. Çünki həsir döşəməyə sərildikdə, evdə rütubət qalmır.
Azertac-ın verdiyi məlumata əsasən bu qədim sənətin davamçılarından biri Astara rayonunun Kakalos kənd sakini Rüfət Rzayevdir. Uşaq yaşlarından həsir toxumağı valideynlərindən öyrənən Rzayev, həsirçiliyin incəliklərini Kakalos Kənd Folklor Evi nəzdində fəaliyyət göstərən "Xalq tətbiqi sənəti klubu"nda gənclərə də öyrədir.
R.Rzayevin sözlərinə görə, əvvəllər bu sənəti öyrədənlər də, öyrənənlər də çox idi. Halbuki bataqlıqda bitən qamışdan ucuz qiymətə müxtəlif məişət əşyaları hazırlamaq olar. Həmçinin, Cənub bölgəsində uzunömürlülüyün sirlərini öyrənən mütəxəssislər də bu qənaətə gəliblər ki, evlərdə həsirdən istifadə edən insanlarda yel xəstəliyinə rast gəlinmir.
Həsir səbətlərdə saxlanılan meyvənin uzun müddət xarab olmadığını söyləyən usta qeyd edib ki, soyuducu həddən artıq soyuq olduqda meyvəni don vurur. Lakin həsir toxunan qamış-çubuqların içərisi boş olduğundan orada havanın temperaturu sabit qalır, buna görə də ərzaq və meyvə təravətini saxlaya bilir.
Əziyyətlə başa gələn həsirlərin satış qiymətləri 10-20 manat arasında dəyişilir. Qamışdan hazırlanan zənbil, tərəzi, çanta, papaq kimi məhsullar isə alıcılara 2-6 manata təklif olunur.
Ömrünün 70-ci ilini yaşayan Rüfət Rzayev həsirçilikdən əlavə Kakalos Xalq Teatrında həvəskar aktyor kimi çıxış edir, rayonda keçirilən mədəni-kütləvi tədbirlərdə fəallıq göstərir.
[caption id="attachment_8513" align="alignnone" width="300"]
Foto Azertac[/caption]
[caption id="attachment_8512" align="alignnone" width="300"]
Foto Azertac[/caption]
