M.Şəhriyar adına Kakalos kənd Xalq teatrı 1950-1955-ci illərdə həvəskarlar tərəfindən Astara rayonunun Kakalos kəndində yaradılıb.
Cenublu.az xəbər verir ki, Kakalos kənd Xalq teatrının ilk böyük tamaşası 1992-ci ilin fevral ayında Astara rayon mərkəzində İlyas Əfəndiyevin “Məhv olmuş gündəliklər” əsərinin səhnələşdirilməsi olub.
Teatrın repertuarında Fatma Həsənqızının “Qızıl alma”, “Meşəmizdə div peyda olub” pyesləri, Qeybulla Rəsulovun “Rəhmə gəl, mələyim” pyesi, Süleyman Sani Axundovun “Tamahkar” komediyası, həmçinin Üzeyir Hacıbəylinin, Cəfər Cabbarlının, İlyas Əfəndiyevin və digərlərinin əsərləri var. Hazırda teatrda 20-dən çox aktyor çalışır.
2016-cı ildə Kakalos kənd Xalq teatrı ilk dəfə olaraq Üzeyir Hacıbəylinin “Arşın mal alan” musiqili komediyasını talış dilində səhnələşdirib. Tamaşada bütün personajların dialoqları talış dilində səsləndirilir, lakin mahnılar əsərdə olduğu kimi, Azərbaycan dilində oxunur.
Teatr 1976-cı ildən Kakalos kənd Folklor evində “Dram dərnəyi” adı ilə fəaliyyət göstərib. 1991-ci ildən sonra M.Şəhriyar adına Kakalos Xalq teatrı adlandırılıb. Hazırda Kakalos kənd Xalq teatrı Astara Rayonu Kakalos kənd Folklor evində fəaliyyət göstərir.
