Cəngitəpə abidəsi Cəlilabad şəhərindən 9 km aralıda, Uzuntəpə kəndinin şimal-şərqində yerləşir [1].
Cəngitəpə ərazisi kurqan və yaşayış yerindən ibarətdir [1,2]. Bu təpənin hündürlüyü 5-6 metr təşkil edir. Cəngitəpə abidəsi 2 hektara yaxın sahəni əhatə edir.
Bu ərazidən bir çox maddi mədəniyyət nümunələri tapılıb. Onların sırasında
küp qablar, daşdan düzəldilmiş həvəng və həvəngdəstə, zoomorf heykəl, müxtəlif formalı əl dəyirmanları, sınıq saxsı qab nümunələri, şamdanlar və digər maddi mədəniyyət nümunələri aşkar edilib. Bundan əlavə, Cəngitəpə ərazisindən neolit dövrünə aid qayıqvari dən əzən daş da tapılmışdır. Ərazidə aşkar edilən maddi mədəniyyət nümunələri burada yaşayışın olduğunu təsdiq edir [1].
Uzuntəpə kəndinin sakini olan tarix müəllimi Ələsgər Mirzəzadə “Sputnik Azərbaycan”a verdiyi müsahibədə deyib: “Bizim kənddə eyniadlı Uzuntəpə, eləcə də Qoşatəpə və Cəngitəpə kurqan abidələri var. Bu kurqanlardan tapılan maddi-tarixi abidələr eramızdan əvvələ gedib çıxır…2011-ci ildə mənim dəvətimlə Elmlər Akademiyasından 3 alim - Tufan Axundov, Anar Ağalarzadə və kəşfiyyat işləri ilə məşğul olan Abuzər Ələsgərov kəndə gəldilər. Professor Tufan Axundov Cəngitəpə abidəsinə baxdıqdan sonra bildirdi ki, sözügedən abidə arxeoloji cəhətdən çox əhəmiyyətli yerdir və dövlət tərəfindən lazımi şərait yaradılarsa, arxeoloji qazıntılar aparıla bilər” [2].
Hazırda Cəngitəpə ərazisi əkin sahəsi kimi istifadə edilir [1].
Ədəbiyyat:
