39 ilini kino sənətinə həsr edən masallılı Bahadur Əliyevi tanıyaq.
Cenublu.az xəbər verir ki, o, 1933-cü il fevralın 24-də Masallı rayonunun Sığıncaq kəndində anadan olub. Bahadur Əliyev 80-ə yaxın filmdə çəkilib.
Əliyev SSRİ və Hindistan kinosunun birgə istehsalı olan “Əlibaba və 40 quldurun macəraları”, Hindistanın “Abdulla”, həmçinin Özbəkistanın “Şerəli və Aybərçin” filmində çəkilib. Lakin o, daha çox “Ulduz” kinofilmindən sonra tanınıb. Həmin ekran əsərində Bahadur “Qədir” obrazını canlandırıb.
Bahadur Əliyev orta məktəbi bitirdikdən sonra Azərbaycan Dövlət Teatr İnstitutunun (indiki ADMİU) kino və dram aktyorluğu fakültəsinə daxil olub. O, 1956-cı ildə institutu bitirib və “Bakı” kinostudiyasında rejissor assistenti vəzifəsinə qəbul edilib.
Əliyev 1957-1959-cu illərdə çəkilən “Kölgələr sürünür”, “Bir məhəllədən iki nəfər”, “Onun böyük ürəyi” və “Onu bağışlamaq olarmı?” filmlərində aktyor kimi çıxış edir. Lakin 1959-cu ildə o, “kinostudiyada işin həcmi azaldığına görə” işdən azad olunur və Bakıdakı “Lal-karlar üçün Mədəniyyət evi”nə bədii rəhbər vəzifəsinə işə düzəlir.
1961-ci ildən “Azərbaycanfilm”də korrektor ştatına işə götürülür. 1961-1965-ci illərdə “Telefonçu qız”, “Əmək və qızılgül”, “Romeo mənim qonşumdur”, “Böyük dayaq”, “Möcüzələr adası”, “Sehrli xalat” filmlərində müxtəlif rollarda çıxış edir.
1965-ci ildə böyük inzibatçı vəzifəsində çalışmağa başlayır. Həmin vaxt o, “Dağlarda döyüş”, “Yenilməz batalyon”, “Yun şal”, “İstintaq davam edir” və s. filmlərdə rol alır.
Bahadur Əliyev 1968-1973-cü illərdə kinostudiyanın dublyaj qrupu direktorunun müavini vəzifəsində işləyir. O, həm xarici və sovet filmlərinin Azərbaycan dilində səsləndirilməsində iştirak edir, həm inzibatçı kimi dublyaj işini təşkil edir, həm də filmlərə çəkilir. Bu dövrdə ekranlaşdırılan “Axırıncı aşırım”, “Həyat bizi sınayır”, “O qızı tapın” və s. kinolentlərdə onun rolu var.
O, 1973-cü ildə kinoaktyor ştatına keçirilir. Bu zaman “Babək”, “Evlənmək istəyirəm”, “Özgə ömür” və s. filmlərdə çəkilir. 1995-ci ildə o, ali kateqoriyalı kinoaktyor vəzifəsində təqaüdə çıxır.
16 sentyabr 2002-ci ildə Sumqayıt şəhərində yolda ürək çatışmazlığından infarkt keçirərək vəfat edib.
