Üç Qəbir ziyarətgahı Cəlilabad rayonunun Dələli kəndinin ərazisində yerləşir.
Buradakı qəbirlər 1959-cu ildə kənd sakini, 12 yaşlı Zərifə Nəzərova tərəfindən aşkar edilib. Deyilənlərə görə, Zərifə yatarkən Allah tərəfindən göndərilmiş bir kişi onu yuxudan oyadaraq bildirib ki, kəndin ərazisində üç müqəddəs adamın qəbri yerləşir. O, həmin zaman qəbirlərin olduğu yeri nişanlayıb. Bir gün sonra Zərifə olanlar haqqında kənd sakinlərinə danışıb. Yerli əhali nişanlanan yeri qazdıqdan sonra qəbirlər aşkar olunub. 1959-cu ildə qəbirləri qorumaq məqsədi ilə kənd sakini Əlixan Zəbi oğlu Nəzərov tərəfindən burada tikili inşa edilib [2].
Pirdə yeddinci İmam Museyi Kazimin nəvəsi Qərib ağa İmam Rzanın övladları Yunis və Yusif, onların bacısı Sidiqə xanım dəfn olunub. Bu qəbirlər təxminən 3-4 metr dərinlikdə yerləşir [1].
Bina düzbucaqlı formadadır. Abidənin ön tərəfində tağvari formada 3 pəncərə və iki qapı yerləşir. Ziyarətgahın damı yaşıl dəmir təbəqə ilə örtülüb. Tikilinin bir günbəzi və iki minarəsi mövcuddur [2].
Sovet dövründə ziyarətgahı bağlamaq məqsədilə qəbirləri torpaqlayıb, üstünü buldozerlə hamarlayıblar. Buna baxmayaraq, ocağa yenə də insanlar gəlirdilər.
Ziyarətgahda niyyət quyusu var. Deyilənlərə görə, ziyarətçinin niyyətinin çin olub-olmayacağı quyudakı suyun qaynaması ilə bilinir [1].
Ədəbiyyat:
Foto Cenublu.az[/caption]
