Abbas Mehdi oğlu Talışinski 15 noyabr 1924-cü ildə Lənkəran şəhərində anadan olub. O, otorinolarinqoloq (burun boşluğu, udlaq, qırtlaq, qulaq xəstəliklərinin müalicə və diaqnostikası ilə məşğul olan həkim), tibb elmləri doktoru və professordur.
Qulaq, burun-boğaz xəstəlikləri cərrahiyyəsində endotroxsal və insufflyasiyon narkoz müalicə üsulu ilk dəfə onun rəhbərliyi ilə Ryazan (Rusiya) klinikasında tətbiq edilib.
Talışinski 1939-cu ildə Lənkəran şəhər 4 saylı orta məktəbini, 1944-cü ildə isə indiki N.Nərimanov adına Azərbaycan Tibb Universitetini bitirib [1].
İkinci Dünya müharibəsi zamanı o, hərbi səhra hospitalında baş həkim işləyib, 1945-ci ildə Almaniyanın Berlin şəhərində Reyxstaqın önündə keçirilmiş qalib qoşunların tarixi paradında iştirak edib [2].
1947-ci ildə Bakıya qayıdaraq ixtisası üzrə işləmişdir. 1950-ci ildə müsabiqə yolu ilə Moskva Tibb İnstitutunda (indiki İ.M.Seçenov adına Birinci Moskva Dövlət Tibb Universiteti) qulaq, burun-boğaz xəstəlikləri üzrə ordinatura keçib və 1953-cü ildə burada aspiranturaya daxil olub.
1955-ci ildən ömrünün axırınadək akademik İ.R.Pavlov adına Ryazan Tibb Universitetində işləyib. 1964-cü ildən qulaq, burun-boğaz xəstəlikləri kafedrasının müdiri, 1989-cu ildən Semaşko adına Ryazan uşaq xəstəxanasının şöbə müdiri olub.
Talışinski 87 elmi məqalənin, 4 ixtiranın, 2 monoqrafiyanın müəllifidir. O, 4 orden və 12 medalla təltif edilib.
Abbas Talışinski 25 oktyabr 2005-ci ildə vəfat edib və Bakıda dəfn olunub [1]. 17 sentyabr 2020-ci ildə Ryazanda Semaşko xəstəxanasının binalarından birində Talışinskiyə xatirə lövhəsi qoyulub [3].
Ədəbiyyat:
