Masallı rayonunun İkinci Səmədxan kəndində təxminən 2,5 kilometr uzunluğunda olan əsas yol uzun illərdir bərbad vəziyyətdədir. Vətəndaşların sözlərinə görə, yolun yararsız olması gediş-gəlişi çətinləşdirir, hətta təcili tibbi yardım maşınları və taksilərin kəndə gəlməsində problemlər yaradır.
Sakinlərin Cenublu.az-a bildirdiklərinə görə, yol illər əvvəl su xəttinin çəkilişi zamanı qazılıb və həmin vaxt asfaltlanacağı vəd edilsə də, bu günə qədər heç bir iş görülməyib. Yolun müəyyən hissələri isə sakinlərin öz vəsaiti hesabına qismən bərpa olunub.
Məsələ ilə bağlı Azərbaycan Avtomobil Yolları Dövlət Agentliyindən bildirilib ki, yolun yenidən qurulması ilə bağlı təkliflər hazırlanaraq aidiyyəti üzrə təqdim edilib. Maliyyə vəsaiti ayrıldıqdan sonra yolun əsaslı şəkildə yenidən qurulacağı və müasir standartlara uyğunlaşdırılacağı qeyd olunub.
Agentlikdən o da bildirilib ki, həmin vaxta qədər yolun hərəkət üçün yararlı və təhlükəsiz vəziyyətdə saxlanılması məqsədilə cari və bərpa işləri davam etdiriləcək.
