Masallı rayonunda gənc oğlanın azyaşlı qızla qurduğu münasibət ağır cinayət işi ilə nəticələnib.
Cenublu.az xəbər verir ki, hadisə Masallıda Heydər Əliyev adına parkda başlayan təsadüfi tanışlıqdan sonra baş verib. 24 yaşlı Nazim parkda azyaşlı Kövsər ilə tanış olub. İlkin etirazlara baxmayaraq, sosial şəbəkələr üzərindən davam edən yazışmalar tərəflər arasında münasibətə çevrilib. Bir müddət sonra ailələrin razılığı ilə, qızın yaş həddi nəzərə alınmadan qeyri-rəsmi nikah mərasimi keçirilib və onlar birlikdə yaşamağa başlayıblar.
Bir müddət sonra qızın hamilə olduğu məlum olub. Bunu eşidən Nazim qızı Bakıya qaçırıb. Lakin istintaq zamanı məlum olub ki, 13 yaşlı qızın hamiləliyinin səbəbkarı Nazim deyil, onun əvvəlki sevgilisi olub. "Nazimlə tanış olarkən əvvəlki sevgilimdən hamilə olduğumu bilməmişəm və xarici görünüşümdən hamilə olduğum bilinməyib," – deyə Kövsər ifadəsində qeyd edib. Buna baxmayaraq, Nazim qızın 14 yaşına çatmadığını bildiyi halda onunla cinsi əlaqədə olduğunu etiraf edib.
Məhkəmədə Kövsər baş verənlərin könüllü olduğunu və Nazimdən şikayətçi olmadığını bildirib. Buna baxmayaraq, Masallı Rayon Məhkəməsinin hökmü ilə Nazim Cinayət Məcəlləsinin müvafiq maddəsi ilə təqsirli bilinərək 3 il 3 ay müddətinə azadlıqdan məhrum edilib.
Qeyd edək ki, adlar şərtidir.
Fidan İlqar
