Masallı rayonunun Çayqıraq kənd sakinləri yol problemi ilə üzləşiblər. Bu haqda məlumatı kənd sakini Rizvan Şıxızadə öz şəxsi Youtube kanalında paylaşıb.
Belə ki, onun sözlərinə görə, onlar asfaltı öz hesablarına döşəmək istəyirlər. "Bizim zona rütubətli olduğu üçün biraz yağış yağan kimi yollar palçıq olur. Uşaqlar məktəbə gedərkən əziyyət çəkirlər. Biz mühəndislərlə danışıqlar aparmışıq, xərcləri hesablamışıq. Kənd sakinləri öz hesablarına yolu asfaltlamaq istəyirdilər, lakin bu çox baha başa gəlir. Kəndin 4 km yolu asfalt olunmalıdır", - deyə o söyləyib.
Həmçinin sakin Masallı rayon İcra Hakimiyyətinin başçısı Şahin Məmmədova müraciət edib: "Hörmətli Şahin müəllim! Bu yolun çəkilməsi üçün kənd sakinləri müəyyən miqdarda vəsait toplamaq istəyirlər. Lakin bizə sizdən biraz köməklik lazımdır. Asfalt və digər ləvazimatları öz hesabımıza alarıq. Amma texnika tərəfindən bizə kömək olunsa, çox minnətdar olarıq",- deyə o müraciətini bitirib.
