Bakıda 58 yaşlı Lerik sakini, 10 uşaq atası tanışını baltanın küt tərəfi ilə vuraraq ağır xəsarət yetirib.
Hadisə Türkan qəsəbəsində, Üzümçülük sovxozu ərazisində baş verib. İstintaq materiallarına görə, Sabir adlı şəxs işlədiyi evin həyətinə sərxoş vəziyyətdə daxil olan tanışı Elmanla mübahisə edib. Elman onun ünvanına nalayiq ifadələr işlədərək üstünə hücum çəkmək istəyib. Bu zaman Sabir əvvəlcə onu itələyib, daha sonra baltanın kəsici olmayan tərəfi ilə başından vurub.
Elman yenidən onun üzərinə gəldikdə isə Sabir bu dəfə həyətdəki dəryazı götürərək küt tərəfi ilə onun sol qabırğasına zərbə endirib. Elman daha sonra xəstəxanaya aparılıb və 9-10 gün müalicə alıb.
Məhkəmədə Sabir törətdiyi əməldən peşman olduğunu, hadisədən sonra Elmanın müalicəsinə maddi yardım etdiyini deyib. Onun rəsmi nikahından başqa qeyri-rəsmi münasibətdə olduğu qadından da övladlarının olduğu və ümumilikdə 10 uşağının olduğu bildirilib.
Bakı Ağır Cinayətlər Məhkəməsi Sabiri 3 il müddətinə azadlıqdan məhrum edib. Lakin cəza 1 il sınaq müddəti ilə şərti hesab olunub.
Adlar şərtidir.
Mənbə: Demokrat.az
