Lənkəran şəhəri, Füzuli küçəsi ilə Şəhid Əli Mehdizadə küçəsinin kəsişməsində, səkinin üstündə tikilməyə başlayan iaşə obyekti sakinlər tərəfindən narazılıqla qarşılanıb. Bununla bağlı onlar bu gün, 11 yanvar tarixində Cenublu.az-a müraciət ediblər.
Belə ki, MTS adlanan məhəllənin girişində tikilən obyekt piyadaların gediş-gəlişini çətinləşdirir və böyük bir yaşayış massivinin girişini daraldır. Piyadalar məcburiyyət qarşısında avtomobil yoluna çıxmalı olurlar, bu da onların həyatlarını təhlükəyə atır.
Həmçinin sakinlər iddia edirlər ki, obyekt 2 saylı poçt şöbəsinin divarına dirənməklə yanaşı, həm də məhəlləyə gedən qaz və elektrik xətlərinin altında inşa edilir:
“Ümid edirik ki, aidiyyəti qurumlar bu məsələ ilə bağlı bizə köməklik göstərəcəklər”, – deyə sakinlər bildiriblər.
Qeyd edək ki, Cenublu.az daha öncə Qala Xiyabani və Mirhaşım Ağayev küçələrində piyada səkisinin üstündə tikilən obyektlər barədə paylaşım etmişdi. Hər iki məsələ Lənkəran şəhər İcra Hakimiyyəti tərəfindən müsbət şəkildə həll olunmuşdu.
[URIS id=51680]
