Bir müddət öncə Cenublu.az xəbər portalı vasitəsilə vətəndaş Mirhaşım Ağayev küçəsində piyada səkisinin qanunsuz zəbt olunması ilə bağlı paylaşım etmişdi.
Məsələ Lənkəran şəhər İcra Hakimiyyəti tərəfindən araşdırılıb. İcra Hakimiyyətinin paylaşımını olduğu kimi oxucularımıza təqdim edirik:
“Bir sıra media orqanlarında Lənkəran şəhərində ümumi istifadədə olan səkinin üzərində qeyri-qanuni tikintinin aparılması ilə bağlı yayılan informasiyalar Lənkəran ŞİH-nin müvafiq şöbəsi tərəfindən yerində araşdırılmışdır. Müəyyən olunmuşdur ki, şəhərin M.Ağayev küçəsi, ev 34 ünvanında vətəndaş Axundov Mahir Əlövsət oğlu tərəfindən mülkiyyətində olan 0.02811 ha torpaq sahəsində yardımçı tikili inşa edilmişdir. Eyni zamanda həmin tikilinin ümumi istifadədə olan səki ilə həmsərhəd olduğu aşkarlanmışdır.
Sakinlərin sözügedən səkidən daha rahat istifadəsini təmin etmək məqsədilə M.Axundovla müvafiq söhbətlər aparılmış və səkinin 40 sm genişləndirilməsinin zəruriliyi xahiş edilmişdir. Vətəndaş M.Axundov öz mülkiyyətində olan torpaq sahəsindən 40 sm hissənin ümumi istifadəyə verilməsini təmin etmişdir”.
