Cəlilabad şəhərinin Səttərxan yaşayış massivində yerləşən qəbiristanlığa gedən yol sakinlər üçün çətinlik yaradır. Bu haqda məlumatı Cenublu.az bu gün, 29 mart tarixində Report.az-a istinadən verir.
Sakinlər qeyd ediblər ki, bu yol uzun müddətdir ki, bərbad vəziyyətdədir: "Yolda qışda palçıqdan, yayda isə toz əlindən hərəkət etmək mümkünsüz olur. Bu qəbiristanlıq Cəlilabad şəhərinin ən böyük qəbiristanlıqlarından biridir. Hər gün bu yoldan yüzlərlə nəqliyyat vasitəsi və sakinlər istifadə edir. Ölülərimizi dəfn etməyə və ya ziyarət etməyə gedəndə çox çətinlik çəkirik. Xahiş edirik ki, bu yola bir əncam çəkilsin".
Vətəndaşların sözlərinə görə, məsələ ilə bağlı dəfələrlə aidiyyəti qurumlara müraciət edilib. Şəhər Bələdiyyəsindən bildirilib ki, sözügedən problemdən xəbərdardırlar. Lakin sakinlərin bələdiyyəyə olan borcları ödənildikdən sonra məsələ həllini tapacaq.
Adıçəkilən yolun üzərində 30-a yaxın yaşayış evi yerləşir.
