Astarada insanların dincəldiyi çimərlik ərazisində avtoxuliqanlıq hərəkətləri edən və bu görüntüləri sosial şəbəkədə paylaşan şəxs inzibati qaydada həbs edilib. Bu haqda məlumat DİN-in mətbuat xidmətinin Lənkəran regional qrupundan Cenublu.az-a bu gün, 28 iyul tarixində verilib.
Astara rayon sakini Muğbil Həsənov etibarnamə olmadan idarə etdiyi “VAZ-21063” markalı avtomobillə çimərlikdə dincələn şəxslərin həyatı üçün təhlükəli olan manevrlər edib və həmin görüntüləri sosial şəbəkədə paylaşıb.
İnsanların istirahət etdikləri məkanda ictimai qaydanı pozan, cəmiyyətə açıqca hörmətsizlik etməklə avtoxuliqanlıq hərəkətlərinə yol verən həmin sürücü Astara Rayon Polis Şöbəsinin dövlət yol polisi bölməsinin əməkdaşları tərəfindən müəyyən edilərək barəsində İnzibati Xətalar Məcəlləsinin müvafiq maddəsi ilə protokol tərtib edilib və toplanmış material hüquqi qiymət verilməsi üçün məhkəməyə göndərilib.
Məhkəmənin qərarı ilə M.Həsənov sürücülük hüququ 1 il müddətinə məhdudlaşdırılmaqla 15 gün müddətinə inzibati qaydada həbs edilib.
