Azərbaycan Dövlət Su Ehtiyatları Agentliyinin sədri Zaur Mikayılov Lənkəran şəhərində vətəndaşlarla görüşüb. Bu haqda məlumatı Cenublu.az bu gün, 12 yanvar tarixində verir.
Qəbul Yuxarı Xanbulançay Hidroqovşağının İstismar İdarəsinin inzibati binasında baş tutub. Burada Lənkəran, Astara, Lerik və digər rayonlardan olan sakinlərin müraciətləri dinlənilib, ərizə və şikayətlərinə baxılıb.
İştirakçılar suvarma suyuna olan tələbatın ödənilməsi, kanalların beton üzlüyə alınması, suvarma suyunun limitinin artırılması, yeni subartezian quyularının qazılması, mühafizə bəndlərinin tikilməsi və təmiri, içməli suya olan tələbatın ödənilməsi, kanalizasiya sistemlərinin yenidən qurulması üzrə müraciətləri səsləndiriblər. Müraciətlərin bir qismi yerindəcə həllini tapıb. Qaldırılan bəzi məsələlər isə araşdırılması üçün nəzarətə götürülüb və həll edilməsi üçün müvafiq tapşırıqlar verilib.
