Cəlilabad rayonunun Uzuntəpə kənd sakini Hicran Məmmədova avqustun 31-də evdən çıxıb və bir daha geri qayıtmayıb.
Cenublu.az xəbər verir ki, 33 yaşlı qadının yaxınlarının sözlərinə görə, o, sonuncu dəfə yaşadığı əraziyə yaxın fermada görülüb. Hicran Məmmədovanın evdə üç azyaşlı övladı qalıb.
İtkin düşən şəxsin qardaşı Taleh Məmmədov bildirib ki, Hicran evdən çıxarkən çiynində məktəbli çantası olub və qara rəngli geyimlər geyinib.
Ərazidə qoyun otaran azyaşlılardan biri isə qadını gördüyünü deyib.
Yaxınları Hicran Məmmədovanın tapılması üçün ətraf rayonlarda da axtarış apardıqlarını bildirirlər.
Daxili İşlər Nazirliyinin Mətbuat Xidmətinin Lənkəran regional qrupundan bildirilib ki, itkin düşməsi ilə bağlı daxil olmuş məlumat üzrə Hicran Məmmədova axtarışa verilib.
Hazırda qadının tapılması istiqamətində polis əməkdaşları tərəfindən müvafiq tədbirlər görülür.
