Çində yeni bir virus yayıldı. Koronavirus pandemiyasının 5 il sonra ortaya çıxan metapnevmovirus (HMPV) adı verilən bu yeni virus, xüsusilə uşaqlar arasında Çinin şimal əyalətlərində sürətlə yayılıb. Virus artıq Qazaxıstan və Qırğızıstanda da qeydə alınıb. Sosial mediada Çindəki xəstəxanalarda maska taxan insanların şəkilləri paylaşılmağa başlanıb və bu virus mətbuat tərəfindən COVID-19-un ilkin mərhələsi ilə müqayisə edilib.
Metapnevmovirus, mövsümi qripə bənzər respirator bir xəstəlikdir və dünya üzrə geniş yayılıb. Bu virus, öskürək, burun tutulması, burun axması, yüksək hərarət, nəfəs darlığı və səsin boğulması kimi simptomlarla özünü göstərir. Çox vaxt kiçik yaşlı uşaqlar və immuniteti zəif olan şəxslər bu infeksiyaya yoluxur. Virus yuxarı tənəffüs yollarında inkişaf edir və ümumiyyətlə 7-10 gün ərzində öz-özünə sağalır. Ancaq immuniteti zəif olanlarda bronxit və pnevmoniya kimi ağırlaşmalar meydana gələ bilər.
Azərbaycan da daxil olmaqla bir çox ölkə virusun yayılmasını yaxından izləyir. Səhiyyə Nazirliyi, ölkə daxilində epidemioloji vəziyyəti nəzarət altında saxlayır və qripin hansı ştamlarının dövr etdiyini müəyyən etmək üçün laborator müayinələr aparır.
Modern.az mövzu ilə bağlı Milli Məclisin Səhiyyə komitəsinin üzvü Pərvanə Vəliyeva və infeksionist Vasif Əliyevlə həmsöhbət olub. Pərvanə Vəliyeva bildirib ki, yeni virusun COVİD-19 ilə oxşar cəhətləri olsa da, bu, pandemiya demək deyil. Metapnevmovirus mövsümi qripin bir hissəsi olaraq yayıla bilər və pandemiya yalnız sürətli yoluxma və yüksək ölüm hallarının olması ilə xarakterizə olunur. Hazırda belə bir təhlükə yoxdur. Vasif Əliyev isə virusun xüsusilə uşaqlar və immuniteti zəif olanlarda daha ağır keçəcəyini qeyd edib və müalicənin əsasən simptomatik olduğunu bildirib. O, əlavə edib ki, xəstəliyə yoluxmamaq üçün gigiyena qaydalarına riayət etmək və tibbi maskalardan istifadə etmək vacibdir.
