Ali Məhkəmədə Yardımlı rayonunda yerləşən anbarın satıcı-anbardarı Vaqif Ağayev barəsindəki kassasiya şikayəti üzrə məhkəmə iclası başa çatıb.
İttihama görə, o, 2020-ci illərdə ASC-lərdən birinin Yardımlı rayonunun Sırıq kəndindəki anbarında işləyərkən buğda toxumlarının satışından əldə edilən vəsaitin bir hissəsini şirkət hesabına köçürməyib. Nəticədə ümumilikdə 57 min 401 manat dəyərində məhsulu mənimsəməkdə təqsirləndirilib.
Lənkəran Ağır Cinayətlər Məhkəməsi ona bəraət vermişdi. Lakin dövlət ittihamçısı və zərərçəkmiş tərəf qərardan apellyasiya şikayəti verib. Şirvan Apellyasiya Məhkəməsi bəraət hökmünü ləğv edərək, Ağayevi 5 il azadlıqdan məhrum etmiş və o, məhkəmə zalında həbs edilmişdi.
Sonradan Ali Məhkəmənin qərarı ilə kassasiya şikayəti qismən təmin edilib, apellyasiya hökmü dəyişdirilib və Vaqif Ağayevə şərti cəza təyin olunub. O, dərhal azadlığa buraxılıb.
