Azərbaycan incəsənətinin korifeyləri - mərhum xalq artisti Canəli Əkbərov və rejissor Vaqif Behbudov bir zamanlar Yardımlı rayonunun təbiəti və insanları haqqında fikirlərini bölüşüblər.
Xalq artisti, xanəndə Canəli Əkbərov modern.az-a müsahibəsində deyib ki, Yardımlı ilk növbədə dinə qarşı böyük məhəbbəti, ikincisi, saf təbiəti və suyu, üçüncü isə, dağ vüqarlı insanları ilə seçilir. O qeyd edib ki, Yardımlı rayonunun insanları milli musiqimizə daha çox dəyər verir:
“Yardımlıda toylarda olmuşam. Burda müşahidə etmişəm ki, onlar bizim muğamlara, milli musiqimizə çox dəyər verirlər. Mən Yardımlını iqliminin saflığına, vətənpərvər oğullarına, milli mənəvi dəyərlərimizə hörmət edən insanlarına görə tanıyıram və hörmət edirəm”.
Onun sözlərinə görə, suyu saf olan yerlərin insanları da saf olur: “Yardımlı rayonunun insanlarında da bu xüsusiyyət öz əksini tapıb. Yəni, yardımlıların təbiəti Yardımlının təbiətinə uyğundur”.
Xalq artisti, rejissor Vaqif Behbudov isə bildirib ki, o, Yardımlı rayonunu daha çox şəlaləsinə görə tanıyır: “Yardımlıda çox gözəl şəlalə var. Onun ətrafı da çox səfalı yerdir. Mən o şəlaləni çəkdiyim bir filmə - Kamil Cəlilovun filminə də salmışam. Hər dəfə o kadrları görəndə Yardımlını xatırlayıram. Çoxları həmin o şəlaləni görməyib, görüb gələn insanlar isə oranı çox tərifləyir ki, nə qədər gözəl yerdir”.
View this post on Instagram
