Lənkəran şəhəri 10 nömrəli tam orta məktəbinin binası üçmaq təhlükəsi ilə üzləşib. Bu haqda məlumatı Cenublu.az bu gün, 5 oktyabr tarixində verir.
Məktəbin pəncərələri çürüyüb, bərk külək əsdikdə çərçivənin çürük olması səbəbindən şüşələr yerə tökülür. Yağış yağanda sinif otaqları gölməçələrə çevrilir. Sanitar qovşaq bərbad vəziyyətdədir. Dam örtüyü çöküb, çürük şiferlərdən axan sular məktəbin əksər siniflərinə axır. Akt zalı, idman zalı, bufet, kitabxana və s. barədə danışmağa belə dəyməz.
Müəllimlər bildirirlər ki, idman zalında uşaqlar qaçanda zalın döşəməsi qırılır və bu da uşaqlar üçün təhlükə yaradır:
“Nəm və rütubətdən uşaqlar tez-tez xəstələnirlər. Bu da dərsləri buraxmalarına səbəb olur. Qışda istilik sistemi sinif otaqlarını isitmir. Bu da şagirdlərdə müxtəlif xəstəliklər yaradır. Qapılar işlək vəziyyətdə deyil, çərçivələri yerindən çıxıb”.
Qeyd edək ki, məktəbin carı vəziyyəti ilə bağlı Cenublu.az olaraq Lənkəran-Astara Regional Təhsil İdarəsinə müraciət etmişdik. Qurumdan bildirilmişdi ki, yaxın dövr ərzində məktəbin əsaslı təmir olunması planlaşdırılır.
