Bu gün Vətən müharibəsi şəhidimizin – Saməddin Fərziyevin anadan olduğu gündür.
Saməddin Mehman oğlu Fərziyev 2001-ci il iyunun 20-də Lerik rayonunun Xanəgah kəndində anadan olub.
2020-ci il 27 sentyabr tarixində başlayan Vətən müharibəsinin ilk günündən etibarən Saməddin Fərziyev müharibədə iştirak edib. Cəbhənin ən gərgin nöqtələrində düşmənlə üz-üzə duran xüsusi təyinatlı qəhrəmanımız Xocavənd rayonu uğrunda gedən şiddətli döyüşlərdə xüsusi şücaət göstərib. Onun son döyüşü də oktyabrın 21-i elə Xocavəndin kəndlərinin azadlığı uğrunda olub. Saməddin dostu Sənanla birlikdə döyüş tapşırığını yerinə yetirərək, düşmənin xeyli sayda canlı qüvvəsini və texnikasını məhv edib. Saməddin və Sənan düşmənin döyüş postunu ələ keçiriblər. Lakin bundan bir neçə dəqiqə sonra xain düşmənin minaatandan açdığı atəş nəticəsində hər ikisi şəhid olurlar. Saməddinin nəşi Qaradağ rayonunun Lökbatan qəsəbəsində torpağa tapşırılıb.
Saməddin Fərziyev ölümündən sonra "Vətən uğrunda", "Xocavəndin azad olunmasına görə" medalları, III dərəcəli “Vətənə xidmətə görə” ordeni ilə təltif edilib.
