Cəlilabadın Adnalı kəndindən olan 79 yaşlı Rübabə Əhmədovanı xəstəxanaların qəbul etməmə səbəbi məlum oldu.
Bu barədə Cenublu.az-a Cəlilabad Rayon Mərkəzi Xəstəxanasının Ümümi şöbəsinin müdiri Hüseyn Niftiyev məlumat verib
Xəstəxanadan bildirilib ki, 79 yaşlı Rübabə Əhmədovanın səhhətində problem yoxdur:
“Yaşlı qadının xəstəxanalıq bir vəziyyəti yoxdur. Kimsəsiz insandır. Ona qulluğunda dayanan adam lazımdır. Xəstəxanada 2-3 dəfə qalıb, müayinələr aparılıb. Heç bir problemi olmadığı məlum olub. Sağlam insandır. Yaxınları olmadığından sığınacağa yelrəşdirilməlidir.
Biz onu saxlaya bilmərik. Çünki göndərişi yoxdur. Onun psixi durumunda problemi var. Lənkəran xəstəxanasına göndərmək istədik, qəbul etmədilər. Daha sonra Salyan xəstəxanasına göndərmək istədik. Orada da yer olmadı. Bakıya göndərişlə göndərdik, orada da dedilər ki, “psixi durumu ilə bağlı problem yoxdur. Yaşlı qadındır. Kimsə sahib çıxmalıdır”... Övladı da yoxdur. Bir qardaşı var idi. O da rəhmətə gedib”.
Nəzrin Vahid
***
Cəlilabadın Adnalı kəndindən olan 79 yaşlı Rübabə Əhmədovaya kömək edən yoxdur.
Cenublu.az xəbər verir ki, 20 ildir tənha yaşayan qadının səhhətində problemlər yarandığı üçün yeriyə bilmir.
Kənd sakinlərinin köməyi ilə bir neçə gün Cəlilabad Rayon Mərkəzi Xəstəxanasına yerləşdirilən Rübabənin psixi pozğunluğu olduğundan, həkimlər onun Ruhi Əsəb Dispanser xəstəxanasına yerləşdirilməsi qərarına gəliblər. Lakin Lənkəran şəhərində yerləşən bu sahə üzrə ixtisaslı xəstəxana onu qəbul etməyib. Buna səbəb kimi isə xəstəxanaya yalnız 60 yaşa qədər xəstələrin qəbul olunduğu bildirilib.
Salyan rayonundakı xəstəxana isə boş yer olmadığını bildirib. Bakı şəhərində yerləşən 1 saylı Ruhi Əsəb Dispanser xəstəxanası Rübabə Əhmədovanı qəbul etməyə razılıq versə də, təcili yardım avtomobili ilə xəstəxanaya çatdırıldıqdan sonra qadını səbəb göstərilmədən qəbul etməyib.
Hazırda Cəlilabad Rayon Mərkəzi Xəstəxanasının qəbul şöbəsində saxlanan qadının hansı müəssisəyə yerləşdiriləcəyi sual altındadır.
