Bu gün Cəlilabaddan olan Vətən müharibəsi şəhidləri - Musa Əsgərov və Rəvan Məmmədovun doğum günüdür.
İşğalçı düşmənin kabusuna çevrilən “Paşam” ləqəbli baş leytenant Musa Əlifağa oğlu Əsgərov 1997-ci ildə fevralın 17-si Sabirabad kəndində doğulub. 2003-2011-ci illərdə N.Məmmədov adına Sabirabad kənd tam orta məktəbində, 2011-2014-cü illərdə isə Cəmşid Naxçıvanski adına hərbi liseydə təhsil alıb. 2014-2018-ci illərdə Heydər Əliyev adına Azərbaycan Ali Hərbi Məktəbində ali təhsilə yiyələnib. Subay idi.
Vətən müharibəsi zamanı Murovdağ döyüşlərində, həmçinin Cəbrayılın azadlığı uğrunda gedən döyüşlərdə iştirak edib. Sentyabrın 28-də Cəbrayıl rayonunun Cəfərabad kəndində kəşfiyyatda olarkən həlak olub. Nəşi 4 gün düşmənin nəzarət etdiyi ərazidə qalıb.
2 oktyabr tarixində Cəbrayıl uğrunda gedən döyüşlərdə onun nəşi döyüş meydanından götürülərək ailəsinə təhvil verilib.
Ölümündən sonra “Vətən uğrunda”, “İgidliyə görə” və “Kəlbəcərin azad olunmasına görə” medalları ilə təltif edilib.
Rəvan İntiqam oğlu Məmmədov 1998-ci ildə fevralın 17-si Novruzallı kəndində anadan olub.
Vətən müharibəsinin ilk günlərindən döyüşlərə qatılıb. Bir sıra uğurlu əməliyyatlarda yaxından iştirak edib. Eyni zamanda şəxsi şücaətlər göstərərək hərbçi yoldaşları ilə birlikdə düşmənə sarsıdıcı zərbələr endirib, onun canlı qüvvəsini məhv edib. Füzuli istiqamətində gedən hərbi əməliyyat Rəvanın son döyüşü olub.
R.Məmmədov 10 oktyabr tarixində Füzuli rayonu istiqamətində gedən döyüşlərdə düşmən tərəfindən atılan artilleriya atəşi nəticəsində şəhid olub.
Ölümündən sonra “Vətən uğrunda” və “İgidliyə görə” medalları ilə təltif olunub.
