Bu gün Lənkərandan olan şəhid Rasim Fətta oğlu Mirzəyevin dünyaya göz açdığı gündür.
Rasim Mirzəyev 1998-ci ildə dekabrın 20-si Gəgiran kəndində anadan olub. 2019-cu ilin noyabrından Şəlalə Mirzəyeva ilə ailəli idi. Asim adlı oğlu yadigar qalıb.
Rasim Mirzəyev bir müddət Azərbaycan Silahlı Qüvvələrinin sıralarında, "N" saylı hərbi hissədə xidmət edib. 2019-cu ildə hərbi xidmətdən tərxis olunaraq mülki fəaliyyətini davam etdirib.
2020-ci ilin iyulun 14-ü Tovuz döyüşləri zamanı general-mayor Polad Həşimovun şəhid olmasından sonra səfərbərlik başlanılıb, Rasim Mirzəyev səfərbər olunub. 2020-ci ildə sentyabrın 21-i hərbi təlim toplantılarına çağırılıb.
Vətən müharibəsində könüllü atıcı olaraq iştirak edib. Füzulinin, Cəbrayılın və Qubadlının azadlığı uğrunda gedən döyüşlərdə vuruşub.
Oktyabrın 22-si Qubadlı rayonu istiqamətində döyüş tapşırığının yerinə yetirilməsi zamanı şəhid olub. Doğulduğu Lənkəran rayonunda torpağa tapşırılıb.
Ölümündən sonra “Vətən uğrunda”, "Cəbrayılın azad olunmasına görə", "Qubadlının azad olunmasına görə" və "Cəsur döyüşçü" medalları ilə təltif edilib.
