Vətən müharibəsi şəhidi Cavid Sahratovun anadan olduğu gündür.
Cenublu.az xəbər verir ki, Cavid Əlikömək oğlu Sahratov 1981-ci ildə dekabrın 23-də Yardımlı rayonunun Əsədabad kəndində anadan olub. 1989-1999-cu illərdə Əsədabad kənd tam orta məktəbində təhsil alıb.
Cavid 2000-2002-ci illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub. 2004-cü ildən müddətdən artıq həqiqi hərbi xidmət qulluqçusu idi. 2016-cı ilin 2-5 aprelində baş verən Aprel döyüşlərində savaşaraq özünü igid hərbçi kimi tanıtmış, düşmənin xeyli canlı qüvvəsini və zirehli texnikasını sıradan çıxarmışdı.
Cavid Sahratov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Cəbrayılın və Füzulinin azadlığı uğrunda gedən döyüşlərdə savaşıb. Cavid oktyabrın 18-də Füzuli döyüşləri zamanı şəhid olub. Yardımlı rayonunda dəfn olunub.
Cavid Sahratov “Azərbaycan Respublikasının Silahlı Qüvvələrinin 90 illiyi (1918-2008) yubileyi”, “Azərbaycan Respublikasının Silahlı Qüvvələrinin 95 illiyi (1918-2013) yubileyi”, “Qüsursuz xidmətə görə 3-cü dərəcəli”, “Azərbaycan Respublikasının Silahlı Qüvvələrinin 100 illiyi (1918-2018) yubileyi”, “Qüsursuz xidmətinə görə 2-ci dərəcəli” medalları ilə, ölümündən sonra isə “Vətən Uğrunda”, “Cəsur döyüşçü” və “Cəbrayılın azad olunmasına görə” medalları ilə təltif olunub.
