Bu gün Biləsuvardan olan XTQ-nin giziri, şəhid Babək Süleyman oğlu Mahmudovun doğum günüdür.
Babək Mahmudov 1995-ci ildə noyabrın 27-si Biləsuvar şəhərində dünyaya göz açıb. Əslən Lerik rayonunun Lələhiran kəndindəndir.
Babək Naxçıvan Xüsusi Təyinatlı Qüvvələrində xidmət üçün imtahanlardan uğurla keçərək, müddətdən artıq hərbi qulluqçu kimi vətənə xidmətini davam etdirib. Manqa komandiri Babək Mahmudlu "İstiqlal" snayper kursunu da müvəffəqiyyətlə başa vurub. Naxçıvanda Türkiyə Cümhuriyyətinin və Azərbaycan Respublikasının keçirdiyi birgə hərbi təlimlərdə snayper atəşi yarışlarında birincilik əldə edib.
Vətən müharibəsi zamanı Babəkin Cəbrayıldan başlayan döyüş yolu Zəngilana, Qubadlıyadək uzanıb. Cəsur döyüşçü çətin döyüş əməliyyatlarının iştirakçısı olmaqla, 89 düşmən əsgərini "İstiqlal"ı ilə məhv edib.
B.Mahmudlu Şuşa uğrunda gedən döyüşlərdə şəhid olub. O, noyabrın 1-i Biləsuvar şəhərində torpağa tapşırılıb.
Ölümündən sonra “Vətən uğrunda”, “Füzulinin azad olunmasına görə”, “Xocavəndin azad olunmasına görə” və “Şuşanın azad olunmasına görə” medalları ilə təltif edilib.
Şəhidin atası Süleyman Mahmudov 1-ci Qarabağ müharibəsinin qazisidir.
