Astara rayonunun ucqar dağlıq ərazilərində baş vermiş torpaq sürüşməsi ilə bağlı Astara Rayon İcra Hakimiyyəti açıqlama verib. Bu haqda məlumatı Cenublu.az bu gün, 15 sentyabr tarixində Trend.az-a istinadən verir.
Belə ki, məsələ ilə bağlı Astara Rayon İcra Hakimiyyəti başçısının birinci müavini Allahverən Mahmudov bildirib ki, sürüşmə baş verən yerdə bir ailə yaşayır.
"Evə heç nə olmayıb. Ev Hirkan Milli Parkının ərazisində qanunsuz tikilib. Evin sahibinə müvafiq qurumlar əvvəllər də xəbərdarlıq etmişdilər ki, həmin ərazi təhlükəlidir. Sürüşmə nəticəsində palçıq gəlib evə dirənib. Əraziyə yerli qüvvələri səfərbər etmişik. İki gün əvvəl ailə təxliyə edilib. Hazırda vəziyyət stabildir", – deyə İcra Hakimiyyətinin rəsmisi qeyd edib.
O bildirib ki, evə baxış keçirildikdən sonra onunla bağlı yekun rəy veriləcək.
"Aramsız yağışlara görə kənd ərazisindən keçən çayın daşması nəticəsində kənd ərazisində piyada körpüsü də uçub. Körpünü sakinlər salmışdılar. Əsas körpü uçan körpüdən bir qədər aralıdadır və dağılmayıb. Sakinlər hazırda ondan istifadə edirlər. Biz rəy verildikdən sonra həmin ailəni oradan köçürmək istəyirik. Yəqin ki, onlara yeni evin verilməsi nəzərdə tutulacaq", – Mahmudov əlavə edib.
