Lənkəranda geyimini bəyənmədiyi şəxsi güləş fəndi ilə yerə yıxaraq xəsarət yetirən şəxs hakim qarşısına çıxarılıb. O, özünü “TikTok”da düzgün kişi kimi yaşamağı təbliğ edən şəxs” kimi təqdim edib.
Musavat.com xəbər verir ki, söhbət 20 yaşlı Elnur Kərimlinin cinayət əməlindən gedir. Elnur Lənkəranda Arif (adlar şərtidir) adlı şəxsi döyüb. Buna səbəb isə Arifin geyim və həyat tərzi olub.
Belə ki, Elnur heç bir səbəb olmadan Arifin geyiminə etiraz edib. Əvvəl onu yanına çağırıb. Lakin Arif onun bu istəyinə “yox” cavabı verib. Elnur Arifə yaxınlaşaraq “bu nə geyimdir?”, “yekə oğlansan”, “geyiminə fikir ver” deyərək iradlar bildirib. Arif ona “yaxşı edirəm, sən kimsən?” deyə cavab verib.
Onsuz da Arifi hədəf olaraq seçən Elnur bu sözü də özünə lap bəhanə bilib. Əvvəlcə Arifin başına bir şillə vurub. Arif oradan uzaqlaşmaq istəyəndə arxadan onun belindən tutaraq güləş fəndi ilə yerə çırpıb. Arif yerə yıxılarkən çiyin sümüyünü sındırıb.
Daha əvvəl oğurluğa görə həbs edilən və 2 il həbs cəzası alan Elnur ifadəsində deyib ki, “TikTok”da doğru kişi kimi yaşamağı təbliğ edir.
Həmin gün də Arifi görəndə əsəbiləşib: “Özümü dolandırmaq üçün Bakıda fəhləlik edirəm. “TikTok” da “elnur-lenko” adlı səhifəm var. Mən orada düzgün kişi kimi yaşamağı təbliğ edirəm. Onu şəhər sakini kimi tanıyıram, amma münasibətimiz olmayıb. Özünü qız kimi aparır, qız kimi yeriyir, qəribə paltarlar geyinir. Ona yaxınlaşıb dedim ki, yekə oğlansan, ayıbdır”.
Elnurun bu hərəkətindən sonra Arif polisə üz tutub. Elnur saxlanılıb və barəsində Cinayət Məcəlləsinin 127.2.3-cü (Qəsdən sağlamlığa az ağır zərər vurma, ümumi təhlükəli üsulla və ya xuliqanlıq niyyəti ilə törədildikdə) maddəsi ilə ittiham irəli sürülüb.
Arif Elnuru bağışlayıb. Amma 2 min manat dəymiş zərər tələb edib. Arif isə cəmi 500 manat ödəyib. Zərəri tam ala bilməsə də, Arif Elnurun həbs edilməsini istəməyib. Məhkəmə Elnura 3 il azadlığın məhdudlaşdırılması cəzası təyin edib.
