Tanınmış jurnalist Vasif Səmədovun 75 illik yubileyidir
Bu gün Vasif Səmədovun doğum günüdür.
Vasif Səmədov 1950-ci il yanvarın 22-də Masallıda anadan olub. 1968-ci ildə Masallıda orta məktəbi bitirdikdən sonra Bakıya gəlib və burada "Azərbaycan pioneri" qəzetində ştatdankənar müxbir kimi fəaliyyətə başlayıb. 1969-cu ildə Azərbaycan Dövlət Radio və Televiziya Verilişləri Komitəsində redaktor vəzifəsinə təyin edilib. Həmin il Bakı Dövlət Universitetinin jurnalistika fakültəsinə daxil olub və 1977-ci ildə təhsilini başa vurub.
Vasif Səmədov uzun illər "Kommunist" (indiki "Xalq qəzeti") qəzetində və SSRİ-nin məşhur media orqanlarında çalışıb. O, həmçinin "Oqonyok" jurnalının və "Literaturnaya qazeta"nın Mərkəzi Asiya və Qərbi Asiya üzrə müxbir bürosunun müdiri, "Kaspian-İzvestiya" beynəlxalq informasiya agentliyinin təsisçisi və direktoru olub. 1991-1995-ci illərdə Bakı şəhər sovetinin deputatı seçilib.
Jurnalistlik sahəsindəki fəaliyyəti ilə yanaşı, Vasif Səmədov "Oqonyok" jurnalının laureatı, "Araz" ali ədəbi mükafatı, "Qızıl qələm" və "Həsən bəy Zərdabi" mükafatlarına layiq görülüb. Kütləvi informasiya vasitələrində uzun müddət səmərəli fəaliyyəti üçün Əməkdar jurnalist fəxri adı ilə təltif edilib.
Vasif Səmədov 2024-cü ilin aprel ayında vəfat edib. Onun "Vtorjenie", "Müdaxilə", "Təki vətən yaşasın", "Vətən üçün lazım gəlsə" və digər kitabları, həmçinin "Leyla Əliyeva: "Xocalıya ədalət!" adlı üçcildliyi geniş tanınıb. O, həm də yeni jurnalist nəslinin yetişməsində mühüm rol oynayıb.
Vasif Səmədovun böyük oğlu Arif Səmədov Azərbaycan Respublikası Prezidentinin Protokol xidmətinin rəisi, ortancıl oğlu Ramin Səmədov Moskva Polis Akademiyasının məzunudur, kiçik oğlu Hikmət Səmədov isə Fövqəladə Hallar Nazirliyində çalışır.
