Lənkəran Şəhər İcra Hakimiyyətinin başçısı Taleh Qaraşov, icra aparatının rəsmi şəxsləri, rayon ictimaiyyətinin nümayəndələri və şəhid ailələrinin üzvləri şəhid Quliyev Samir və Quliyev Vüsalın məzarlarını ziyarət ediblər. Bu haqda məlumatı Cenublu.az bu gün, 28 sentyabr tarixində verir.
Lənkəran şəhərində və Velədi kəndində keçirilən ziyarət zamanı qəbiristanlıqdakı bütün şəhidlərimizin məzarları önünə gül dəstələri düzülüb, xatirələri anılıb, ruhlarına dualar edilib. Taleh Qaraşov şəhidlərin ailə üzvləri ilə söhbət edib, qayğı və problemləri ilə yaxından maraqlanıb.
Qeyd edək ki, Suqovuşan döyüşləri zamanı şəhid olan kapitan Vüsal Quliyev hələ sağlığında dövlət başçısının Sərəncamı ilə “Azərbaycan Ordusunun 100 illiyi” yubiley medalına layiq görülüb. Ölümündən sonra isə “Vətən uğrunda”, “Füzulinin azad olunmasına görə” və “Qubadlının azad olunmasına görə” medalları ilə təltif olunub. Samir Quliyev isə ölümündən sonra cənab Prezident İlham Əliyev tərəfindən “Vətən uğrunda”, “Füzulinin azad olunmasına görə” və “Cəsur döyüşçü” medalları ilə təltif edilib.
